記憶中的歲月~歐陽珮珊 OLD NEWS-21

*俏黃蓉練氣功　歐陽珮珊學生過千*

歐陽珮珊（原名陳潔英）十六歲入娛樂圈，拍了第一部電影《瓊花仙子》，到三十六歲離開，整整二十個年頭裡，歐陽珮珊自言不算大紅大紫，但名氣是有一點的。離開娛圈後，她跟了師傅學習氣功，然後開班授徒，過程就像一齣武俠電影。短短幾年間，門下弟子超過一千人，今天她的身分是CKY（醫學氣功健體研習中心）師傅，丈夫郭鋒反而是「師母」。說這句話時她忍不住發出一陣笑聲，不變的，正是那分爽朗性格。	歐陽珮珊認為，相對以往演藝生涯，現在教授氣功的日子才叫真實。

星塵往事拍戲失足傷腰骨歐陽珮珊對於以往在娛樂圈發生的事，能準確說出來的不是很多，看得出「心」是真的離開，沒有留戀了；反而提到她現時主理的氣功研習中心，她的話題便滔滔不絕。但令她由娛樂圈幕前工作，走到去做氣功治療的另一個天地，穿針引線的，仍然是她的演藝事業。	無線八三年《神鵰俠侶》中，珮珊(前左二)的扮相被喻為最經典中年黃蓉。

與謝賢拍攝電視劇《真命天子》，
珮珊飾演呂后。

「我第一齣戲係九龍電影公司的《瓊花仙子》，男主角係林錦棠。當時得十六歲，覺得拍戲好好玩，到九○年退出時，我已知道自己鍾意拍戲，但唔鍾意娛樂圈。呢行好得意，無得靜靜o地做，一係你好紅，o的人猛搵你做o野，一係就無人搵你，完全無得掌握。所以我對以前o既生活，真係無乜留戀。
「而我學中醫可以話係入行時種落，當時拍明星公司的《瘋狂殺手》，有一場戲講我騎馬追蹤仇人，點知去到山邊的時候，唔小心失手跌o左落山，整傷條腰骨，當時後生唔覺有乜問題。

拆骨再嵌唔敢試「點知到o左十年後，有一日我早班去拍外景，出門口時，突然間覺得條腰骨好痛，郭鋒又因為有戲拍已經出門，冇人幫到我。最慘係條腰一郁就痛，一痛就痛o左三個鐘頭，到後來冇咁痛，先可以起身打電話，叫人送我去醫院。	郭鋒與珮珊的緣分，始於在麗的電視合作之時。

珮珊一次拍戲受傷，做就了
日後成為氣功師的緣分。

「醫生話我條腰骨移o左位，壓住條神經線，我先諗到可能係先前拍戲整親o既舊患。醫生同我講，要醫番唔難，只要用兩個禮拜時間，將o的骨拆鬆，然後再嵌番埋就可以，但你知啦，聽落咁牙煙，梗係唔敢試，結果睇o左好多其他物理治療同跌打都唔好，心諗不如試o下針灸。」這一試便種下日後做氣功師的種子。

氣功因緣
醫師來電收我為徒

「我第一次學中醫時，是跟一個針灸師傅學，覺得佢樣樣依書直說，書講一二三，佢就教一二三，冇話解釋點解會係一二三。

後尾直頭好似搵我做宣傳咁，有人o黎睇症，佢就問人：『你知唔知佢係邊個？佢o依家跟我學醫呀。』所以後來我就冇再跟佢學。而我正式學中醫，是跟一位賀醫生，讀o左一個成都醫學院o既儀器應用函授課程，當時我重做緊電視台，有記者朋友問我最近忙o的乜，我就話我讀緊個中醫課程，於是就有報章話我學緊中醫。之後有日有人打電話畀我：『我叫張仁峰係中國國家認可氣功教授，我睇報紙知道你有興趣行醫，我睇你平時做戲，覺得你個人忠厚，我可以教你氣功。』
「當時我已經o係沙田開o左間醫療保健中心，雖然覺得好奇怪，但就諗住見識o下，就請佢o黎我公司傾o下，然後我就搵o左我老爺、奶奶做媒，等張師傅幫佢o地睇症，睇完之後，我問兩位老人家覺得點，佢o地都話，感覺好得意，唔識講，但係覺得舒服o左。」

珮珊學生不乏以前藝員朋友，
如容守怡（左一）。

歐陽珮珊所習的氣功，沒一定
修煉姿勢，全憑個人喜好。

行醫冇NG壓力大

有了這次考驗，歐陽珮珊終於定下心來，跟張仁峰學習氣功。「其他同學係跟張師傅學習，所以他們是師生關係，但我係正式跪地斟茶o既入室弟子，我同師傅係師徒關係。
「九○年開始，我正式跟師傅學習氣功；九四年正式開班授徒，學生由六歲到八十五歲，有o的重係一家十幾口都跟我學，o個種開心，唔係做娛樂圈時可以得到。以前做藝員，日以繼夜都係扮演其他人角色，感覺好唔真實，o依家就唔同，每一個學生每一個病人都係真實，過程唔可以出錯，冇得NG，所以壓力大o左但好開心。

二人世界
結婚二十年不要孩子

與郭鋒結婚超過二十年，二人一直沒有生小孩的打算，原因與歐陽珮珊來自大家庭不無關係。她說：「我本身屋企有十三個兄弟姊妹，能夠養大只有六個，所以我覺得要湊大一個小朋友，唔係易事，加上郭鋒的哥哥已有小朋友，所以我o地就冇咁大壓力，唔生都冇問題，我當正個姪係我個仔一樣。」

珮珊說第一眼見到郭鋒，便感到
這人是自己的終身伴侶。

問到珮珊與郭鋒恩愛之道，
她認為最緊要有溝通。

兩個人的 Meeting

二人結婚多年，一直被視為模範夫婦，原因是全靠溝通，「一來我o地都係食娛樂圈呢行飯，對於大家工作環境都好熟悉，所以冇話聽到佢同女藝員食飯就呷醋，或者我同男藝員拍親熱戲佢就唔高興。
「加上平時我一見佢冇咁忙，就會捉佢出去食飯，或者去酒店飲咖啡，然後就將我近來對佢o既不滿，一次過講晒出o黎，然後大家傾o下點解決。所以我o地屋企好怪，雖然得兩個人，但係成日Meeting。加上結o左婚咁耐，都相處得爐火純青，我主力發展我o既氣功事業，但郭鋒同我唔同，佢重好有興趣演戲，所以佢o係屋企得閒時至幫o下手教『動功』，其他時間要賺錢養我，哈哈！我o地又好滿足o依家生活，所以實在冇乜好嘈！」

藝名：歐陽珮珊
原名：陳潔英

入行經過：
1970　因一次中國舞表演，被九龍電影公司老闆看中。
　　　出道第一部電影《瓊花仙子》；後加入明星公司
　　　演國語片《千鈞一髮》及《瘋狂佳人》等
1973　加入富國公司，主演《石破天驚》
1975　加入「麗的電視」
1977　與藝員郭鋒結婚
1978　加入「無線電視」
1983　拍攝《神鵰俠侶》，被喻為最神似的中年黃蓉
1984　與羅文合演舞台劇《柳毅傳書》
1987　加入「亞洲電視」
1990　拍攝日本電視台製作《宋家三姐妹》後，正式退
　　　出演藝界。跟隨張仁峰學習「內養功」氣功
1994　正式開班授徒教氣功

最難忘演出
．九龍電影公司的《瓊花仙子》
．無線電視《楚留香》飾演黑珍珠
．無線電視《神鵰俠侶》飾演黃蓉

　( 摘自：蘋果日報副刊 (生活家庭) APR-17-2002 )

珮珊自言離開娛樂圈後，工作更忙碌
但生活卻較以往開心。

珮珊(藍衫左)說郭鋒(藍衫右)始終較喜歡演戲，只是閒時才幫忙教「動功」。